Ikotofetsy sy Imahakà - 9) Ilay nametsy vahoaka manontolo
Indray andro hono, tapakevitra Ikotofetsy sy Imahakà fa ny vahoaka manontolo mihitsy no ndeha hofitahiny
Raha amin'ny teny frantsay,
dia peho eto 👇
Mose Njo
Indray andro hono, tapakevitra Ikotofetsy sy Imahakà fa ny vahoaka manontolo mihitsy no ndeha hofitahiny.
Ny fomba hitany mahomby indrindra dia ny nilalao ny finoan'ny vahoaka.
Dia iny àry Ikotofetsy, mody nanao mpisikidy niova fo ka mody nanao mpivavaka be. Dia iny koa Imahakà, mody nanao pasitera.
Ratsiratsy ny andro tamin'izay, maizin-kitroka ny tany aman-danitra, nifofofofo be ny rivotra. Ka izay indrindra no nahatapakevitra an'Ikotofetsy sy Imahakà.
Namory vahoaka teny an-tsena àry izy roalahy, ka nanao hoe:
"Tezitra aminareo Andriamanitra. Tezitra mafy aminareo Andriamanitra"
Dia nikotroka ny lanitra. Nisy tselatra nanazava tampoka. Vao mainka natahotra ny vahoaka.
"Tezitra Andriamanitra fa nanota ianareo. Fa aza manahy, niresaka taminy kosa izahay, hoe tsy havelany ho very ianareo. Fa izao kosa, mila mibebaka, mila mivavaka mafy, mila manaporofo ny fitiavanareo an'Andriamanitra"
Dia lasa Ikotofetsy naka harona ngôda be dia nitanty rakitra tamin'ireo vahoaka manontolo. Dia nahazo vola be izy roalahy.
Dia avy be ny orana, ka lasa nody avokoa ny vahoaka,. Ikotofetsy sy Imahakà ihany koa lasa nialoka.
Ny ampitson'iny, nony nitsahatra ny orana, dia niverina teo an-tsena Ikotofetsy sy Imahakà, ka namory vahoaka indray, sady nihirahira sy nampandihy vahoaka.
"Hitanareo. Lasa ilay oram-be, lasa ny rivotra nifofofofo, niverina ny masoandro. Rehefa manara-dia anay, dia manara-dia an'Andriamanitra. Sa tsy marina hany izany?"
Dia nihoraka ny vahoaka manontolo hoe:
"Marina hany izany!"
Dia mody nilaza Ikotofetsy hoe Imahakà taloha tsy afa-namindra fa tao am-pandriana foana, fa noho ny finoany [f], dia izao izy afaka mamindra tsara izao.
"Sa tsy marina hany izany?"
Dia nihoraka ny vahoaka manontolo hoe:
"Marina hany izany!"
Dia lasa indray Imahakà nitanty rakitra tamin'ny harona ngôda be tamin'ireo vahoaka manontolo. Dia nahazo vola be izy roalahy.
Ary nanomboka teo hono Ikotofetsy sy Imahakà no tena lasa mpanankarembe. Satria izay lazainy rehetra dia inoan'ilay vahoaka.
👇👇👇