Ikotofetsy sy Imahakà - 2) Ilay fotoboasary
Indray andro hono, vokivoky tany amin'izay nalehany tany Imahakà no nanita-kevitra fa te hitady voankazo. Mbola fetsifetsy sy mamitapitaka olona hatrany izy
Raha amin'ny teny frantsay,
dia peho eto
👇
Mose Njo
Indray andro hono, vokivoky tany amin'izay nalehany tany Imahakà no nanita-kevitra fa te hitady voankazo. Mbola fetsifetsy sy mamitapitaka olona hatrany izy.
Nanana vola izy tany aminy fa efa fahazaran-dratsiny loatra ilay mamitapitaka olona hany ka nitady hevitra izy hahazoana voankazo tsy mandoa vola.
Ka nitady izy ka nitady, ary ela ny ela nahatazana avy lavitra tanimboasary tsisy mpiambina izy teny am-pitan-drano tery.
Avy hatrany, nitady lakana azo hangalarina izy dia saika hiampita rano kinanjo nisy olona nipoitra tampoka teo amin'ilay tanimboasary ka kivy Imahakà.
Efa saika handeha mihitsy izy no tsinjony fa Ikotofetsy kay ilay olona nipoitra tampoka teo amin'ilay tanimboasary ka nijanona indray, dia nipetraka, dia nieritreritra kely.
Iny Ikotofetsy handeha hioty voasary anankiray no avy hatrany dia nisy vato nitefoka teo amin'ny lohany. Narary ny lohany, ary tezitra mafy Ikotofetsy. Nitoditodika izy hoe mba izy koa izany. Dia tazany tery am-pita nisy lehilahy nisaron-tava miantsoantso sady mandrangitra anazy hoe:
"Tifiro aho raha mahavoa ialahy!"
Vao mainka romotra Ikotofetsy, dia nitaditady tamin'ny tany izy saingy tsy nisy n'inon'inona natoraka afa-tsy ilay vato natorak'ilay lehilahy nisarontava teo ihany.
Dia noraofiny, dia nitoraka mafy dia mafy tamin'ilay lehilahy nisaron-tava izy. Tsy voa. Tsy mahitsy toraka Ikotofetsy.
Dia noraofin'ilay lehilahy nisaron-tava ilay vato teo ihany, dia notorahany indray. Dia voa ny kibon'Ikotofetsy, dia vao mainka izy niharomotra hatrany, ka noraofiny indray ilay vato teo ihany, dia nikendry izy, dia nitoraka.
Fa mbola tsy voa ihany ilay lehilahy nisaron-tava. Dia tsy vato indray no nalainy fa baingan-tany. Dia voa indray Ikotofetsy, saingy tsy afaka nampiasa ilay baingan-tany izy fa nipasaka ilay baingan-tany, nefa ny hasosorany efa mafy dia mafy.
Ka jamban'ny hatezerana izy dia izay tazany teo no nalainy. Dia voasary no tazany. Dia nalainy. Dia voasary no natorany. Dia voa ilay lehilahy nisaron-tava. Ary nikiakiaka fatratra. Fa tsy nianjera. Dia faly izaitsizy Ikotofetsy ka nioty voasary hafa indray dia nitoraka. Dia nahavoa. Dia nikiakiaka ilay lehilahy nisaron-tava. Dia notorahan'Ikotofetsy tsy ankijanona, raha tsy nitolefika tamin'ny tany ilay lehilahy nisaron-tava.
Dia nikakakaka nihomehy Ikotofetsy sady nitsinjatsinjaka nandihy fandresena.
Tamin'izay no niharina ilay lehilahy nisaron-tava, sady nikakakaka nihomehy no nanala ny sarontavany.
Taitra Ikotofetsy hoe Imahakà ilay lehilahy.
"Ialahy ve dia mihevitra tokoa hoe marary izany voatoraka voasary izany?", hoy Imahakà sady nikakakaka hatrany izy.
Dia navoakany ilay harona tany am-paosiny, dia noraofiny ka nataony tao ny voasary rehetra, afa-tsy anankiray, izay nohaniny teo imason'Ikotofetsy sady nihosanosana izy.
Ikotofetsy amin'io nidiridiry fotsiny tsy tonga saina hoe Imahakà anie ity olona ity, ary lasany daholo anie ireo voasary teo an-tokotany.
👇👇👇