Sakabeloha
Indray andro hono, nisy akohokely izay
Raha amin'ny teny frantsay, dia peho eto 👇
Mose Njo
Indray andro hono, nisy akohokely izay.
Akohokely no fiantso azy, ary trano kely iray izay no nipetrahany, tao anaty tanàna kely iray izay.
Tsy dia tena hoe lehibe loatra i Akohokely.
Tsy dia tena hoe kely loatra koa.
Tsy dia azo atao hoe matavy nefa tsy dia azo atao hoe mahia ihany koa.
Indray maraina izay, teo am-pisotroana dite i Akohokely, sady namaky vaovao tamin'ny Facebook no tojo lohateny nampivarahontsana:
HILATSAKA ETO AN-TANY NY VOLANA!
Nangovitra ny tanàna dia latsaka ny kaopin-diteny. Niparasaka tamin'ny tany ilay kaopy dia iny izy no lasa nirifatra nivoaka ny trano. Hadinony hatramin'ny nandroaka ny vakina kaopy tamin'ny tany. Hadinony hatramin'ny nanidy trano nony nivoaka.
Teny an-dalana izy no nandefa hafatra tamin'ny namany rehetra hoe hilatsaka eto an-tany ny volana. Sady nandefa hafatra miafina izy no nanoratra teo amin'ny rindriny.
Nifanena tamin'i Akohovavy izy. Taitra ity farany nahita azy sady nipararetra no fotsy hatsatra toy ny lany ra ny tavany.
"Fa inona izato mahazo anao ry Akohokely?", hoy i Akohovavy.
"Hilatsaka eto an-tany ny volana", hoy i Akohokely
"Izany ve?", hoy i Akohovavy
"Hilatsaka eto an-tany ho'aho ny volana. Tamin'ny Facebook no nahitako an'izany", hoy i Akohokely nanamafy.
"Loza! Raha Facebook no milaza an'izany, dia tsy maintsy marina izany. Ndao hampandre ny olona", hoy i Akohovavy
Dia sady nandeha izy roa no nanoratra tamin'ny Facebook i Akohovavy hoe hilatsaka eto an-tany ny volana.
Dia nisy nanoratra teo amin'ny rindrina, i Ganaganabe niteny hoe:
“Loza koa izany, inona no atao?”
Dia namaly i Akohovavy hoe tongava aty izao dia izao. Dia tonga i Ganaganabe, niaraka tamin'i Gisakely.
"Fa taiza no na henonao izay vaovao izay?", hoy i Gisakely mantsy an'i Akohovavy
"Akohokely no nilaza tamiko?"
"Ary taiza no henonao izay vaovao izay?", hoy i Gisakely mantsy an'i Akohokely.
Tonga tampoka Ravoromailala nanao hoe:
"Andao ry ireto hitsoaka fa efa mandeha ny resaka amin'ny tele sy radio hoe hilatsaka eto an-tany ny volana fa mila miafina isika. Nahazo hafatra miafina tamin'ny Facebook hono ry zareo, ary mizara an'izany daholo eraky Facebook rehetra iny"
Dia hoy i Akohokely: "Izay anie ho'aho ilay lazaiko e!
Dia niaraka nirohotra ry zareo tsy dia nahita hoe aiza loatra ny tany hisitrahana hiafenana amin'ny volana hilatsaka eto an-tany. Teo ry zareo no tojo an'i Sakabeloha, izay variana nanoratra tamin'ny telefoniny.
"Sakabeloha ô!", hoy i Akohovavy. "Hilatsaka eto an-tany ny volana fa andao hiafina"
"Izany ve?", hoy i Sakabeloha.
"Izany mihitsy", hoy Ravoromailala. "Tamin'ny Facebook ilay izy no hita voalohany, dia avy eo ny tele sy radio tsisy izay miresaka momba an'izany"
"Raha Facebook no milaza an'izany, dia tsy maintsy marina izany", hoy i Akohovavy nanamafy.
"Andao daholo fa mahita toerana hiafenana aho", hoy i Sakabeloha.
Dia nanaraka daholo ry zareo, dia niditra tao anaty trano iray izay, dia nakaton'i Sakabeloha tamin'ny lakile ny varavarany sady nitsiky hafahafa izy.
Ny ampitson'iny, tsisy nahita intsony i Akohokely sy Akohovavy sy Ganaganabe sy Gisakely sy Ravoromailala.
Sakabeloha kosa nibontsin-kibo, nizihitra izaitsizy, falifaly ery mitsilailay sady mandrezatry ny havokisana.
Ny olona teny an-dalana efa nanadinodino sahady an'ilay hoe hilatsaka eto an-tany ny volana no sady variana ao anaty telefonina moa i Sakabeloha sady manoratra ao amin'ny telefoniny ao amin'ny Facebook ihany tsy hay hoe inona indray, no sady mitsikitsiky hafahafa hatrany.
👇👇👇