9
Toy ny kimiaramila filalaon’ny ankizy kely ny fahitan’i Lisy ny haben-dRabe sy ny reniny ery lavitra azy ery, midina ny Lalana Tsiombikibo hamonjy ny Tranovato Ambatonakanga.
Tsy hitan-dRabe loatra izay havaly fa ny reniny no tsapany fa te hivazavaza fa nanindry fo nanoloana an’ilay mpampily toa gisalahy homan-ketsa ka izy manao ny tsy mety indray no avo vava.
Tsapan’ny reniny ihany koa anefa fa nisy hadisoany ihany, tsy nijery tsara izy hoe sao misy mpamily adaladala any ho any vao niampita. Ramatoa somary vaventy izay no nampangina an’ilay mpamily sady nikapoka kely ny lohany no nitabataba hoe ianao aza tsy nijery lalana akory no mbola be levilevy eo. Nony nandeha ilay mpamily dia nitatitra azy mianaka ny zava-nitranga sady namafa ny hatsembohany tamin’ny mosoara ihany izy.
Teo no henon-dRabe voalohany ny fisian’ilay tovovavy izay tsy mbola fantany hoe iza ary tsy azony veroka mihitsy rahateo hoe inona no fifamatorany amin’ny lalam-piainany. Tsy fantany rahateo hoe i Lisy no anaran’ity tovovavy ity ary hanova ny fiainany tanteraka anie izy io tsy ho ela. Raha tsy nisy azy hoy ilay ramatoa, maty teto daholo isika mianakavy.
”Mba mandehana ianareo mianaka misaotra azy e! Iry izy iry, sady nanondro ilay vato be teo amin’ny sisin’arabe teo ambony kelin’ilay takisiabe izy, hitanareo iry tovovavy misatroka be mavokely sy…”
Taitra ilay ramatoa.
”Oadray! Ary nankaiza izy teo?”
Gaga dia gaga izy sady mbola nanondro ilay vato no nanontany ireo rehetra mbola badenindenina tafavoaka ilay takisiabe hoe nankaiza ilay tovovavy teo. Tsy nisy nahatsikaritra. Niroso tsimoramora nankeny amin’ilay vato Rabe, nanavatsavatsa ireo mpandalo nivangongo teo afovoan’ny arabe. Nisy zavatra nanaitra ny masony, zavatra mavokely tamin’ny tany, lohan’ilay tovovavy nihoson-dra nipoitra kely tao ambadik’ilay vato. Niontana ny fon-dRabe, mitsirara ilay tovavavy namonjy azy. Nihazakazaka izy, nodoniny ilay mpamily takisiabe izay mbola saika hangataka afo tany aminy ary nony tonga teo amin’ilay vato izy dia nisento. Tsy lohan’ilay tovovavy no tazany fa ilay satroka ba fotsiny ihany ary tsy tena hoe nihoson-dra be tahaka ny inona loatra ilay izy fa nisy ra kely fotsiny. Fa na izany aza, hoy Rabe niteny irery, ny lohany no voa.
Rehefa avy nifanao veloma tamin’ilay ramatoa sy ireo mpandeha takisiabe izy mianaka no injay naneno ny lakolosim-piangonana teny amin’ny Tranovato Ambatonakanga tery ambanimbaniny tery. Na dia tsy maty fo aman’aina aza, mbola tsy tena tonga saina tanteraka ka notaritin-dreniny handeha malaky Rabe. Lasa saina ity farany sady namihina tsy nahy ilay satroka be no nanontany tena hoe mba iza loatra aza izany tovovavy nanavotra ny ainy izany.
Tsy hitan-dRabe fa tsy lavitra azy teo no nisy an’i Lisy, teny ambanin’ny kianja basiketin’ny Kolejy Maria Manjaka nitazana avy lavitra, nanadio ilay ratra teo amin’ny lohany, nidona tamin’ny famantaramilin’ilay takisiabe.
Toy ny kimiaramila filalaon’ny ankizy kely ny fahitan’i Lisy ny haben-dRabe sy ny reniny ery lavitra azy ery, midina ny Lalana Tsiombikibo hamonjy ny Tranovato Ambatonakanga. Nijery lanitra Rabe, nahita kisarisarin’anjely maromaro nisoritra teny amin’ny rahona toa nitazona zavatra tsirairary tsy voavinany hoe inona. Tafajanona kely mihitsy aza izy ary raha tsy ny reniny no nisintona azy hoe maika maika maika angamba revo teo. Raha naka fotoana kely kokoa anefa Rabe nandinihana kokoa ilay rahona dia hitany fa trompetra no notazonin’ireo kisarisarin’anjely nisoritra teny amin’ny rahona…
Ireo voambolana 9
- gisalahy homan-ketsa
izy manao ny tsy mety indray no avo vava
se dit d’une personne qui est dans le tort et qui non seulement ne l’admet pas mais en plus se permet d’élever la voix - levilevy
vava ankatezerana atao amin’ny olona eo ambany fifehezana lazaina fa nanao hadisoana
réprimandes - tsy azo veroka
tsy azo an-tsaina
ne pas se douter - badenina
fanin-tsofina
assourdies - mitsirara
mitsilany amin’ny tany
avachie par terre - famantaramilina
solaitra ahitana ny fitaovana ilaina amin’ny familiana
tableau de bord - kimiaramila
lalao miendrika miaramila kely
soldat de plomb - revo
variana ka tsy mahatsiaro intsony izay ambonin’ny tany
complètement perdu dans ses pensées
Mose Njo