2

I2

0:00

/418

1×

Variana ilay goaika nitazatazana avy teo am-baravarakelin-dRabe.

Tsy hay moa izany na tena variana marina izato vorona na ahoana fa toa nibaribary fotsiny izy sady nitsako hanina tsy taza-maso loatra izany. Rehefa dinihana akaiky ilay goaika dia tsikaritra ihany hoe nitsiritsirika ny tao an’efitra avy teo amin’ilay varavarankely somary nisokaka. Nitsoka mafy ny rivotra tany ivelany tamin’izay na dia nibaliaka teny amin’ny tavan-dRabe aza ny masoandro.

Tampoka teo nefa, saron-javona ny tany aman-danitra ary toy ny tsy teo, tsy hita popoka ingahibe masoandro, nisitrika tany amin’ny tsy taka-maso. Re nisitra Rabe, asa izy na nanomboka nitady hiarina na niverina nandry, ny torimasony ity efa nisinda, ny lohany nifono bodofotsy nefa ingahibe masoandro efa dila. Teny amin’iny Ambohijatovo Ambony Ambohimanoro iny no nisy ny fonenan-dRabe, zara raha nahita izay lalan-kombana na ny olona na ny fiarakodia, rako-javona ny tanàna ary harona sase maintimainty nihoso-menaka nisy sarina elefanta iray no nitsingevana tsy an-kihetsika am-pitoerana toy ny angidina segondra vitsivitsy teo anoloan’ny varavarakelin-dRabe tsy hay hoe avy aiza – ny efitrano fandriany moa nitoetra teny amin’ny rihana voalohany. Nitsipalotra kely ilay goaika, nijery kely hoe mba inona izany tao afarany izany, dia niverina nandinika an-dRabe mbola tsy hita taratra izay mety ho tena fahavitrihany. Nifofofofo indray ny rivotra ka nentiny lavitra ilay harona sase, nentiny nisidina iny kianjan’Ambohijatovo iny, Andohan’Analakely, Tranompokonolona, saika naviliny ho eny amin’ny Totohabaton’Antaninarenina iny nefa narosony indray ho any amin’iny Tsangambaton’i Jean Ralaimongo iny izay vao namonjy tatatra efa ela dia ela no tsentsina, tsy nisy niraharaha loatra, teo anoloan’ny Lapan’ny Tanàna.

Tsy tsikaritry Rabe nefa izany rehetra izany, izy mbola niady mafy tamin’ny torimaso nony nipika ny famohamandry. Nivoadivoady mangina hoe dimy minitra fotsiny, dimy fotsiny dia miarina aho. Asa hoe inona no tena atao hoe revin-gadran’alatsinainy, ilay izy teo niezaka mafy ny hifikitra tamin’ilay minitra iray monja ve sa ilay izy tena nihevitra tokoa fa afaka dimy minitra dia hiarina tampoka? Asa aloha fa ny azo antoka kosa dia gadra izy. Gadra isika rehetra. Samy gadran’ny fotoana. Kodiaran-tsarety rahateo hono ny fiainana, indraindray ambony, indraindray ambany, toy izany koa ny herinandro ka ny zomà hariva, sabotsy sy alahady hono no ambony ary ny ambiny sisa kosa, dia ambany avokoa ka ny alatsinainy no vitsy mpitia indrindra. Ary toy izany no fahitan-dRabe ny fiainany. Dia nisento izy. Dia hoy izy anakampony:

“Inay tsy mba niposaka izany io ingahibe masoandro io, na dia androany fotsiny, inay tsy nisinda iny minitra tokana iny, na dia vetivety fotsiny, eny, na mandrakizay doria amena aza tsy maninona” sady nofikirina mafy ihany ilay ondany mena midorehitra sy ilay bodofotsy maitso mavana misy sarina siponjy mavomavo mitsiky vendrana.

Dia iny saika tonga iny indray ny torimasony no taitra tampoka izy, tonga dia tafarina, ny bodofotsiny nipitika tamin’ny tany moa ny fijeriny tsy nifanalavitra tamin’ny fijerin’i Bob ilay Siponjy.

Ny reniny no nitabataba mafy niantso azy hoe mifohaza amin’izay. Isak’alatsinainy dia toy izao foana: mitaratra ny masoandro, misitra Rabe, maneno ny famohamandrin’ny telefoniny, pihany malaky, ndeha hiverina hatory tsara iny izy no tairin’ny reniny amin’ny antsoantsony sady mafy no mikarantsana mankadilo sofina tsy tanty hany ka miarina tsy satry izy ary tsy miverina matory intsony. Tsy azony an-tsaina mihitsy tamin’izay na ny kely variraiventy aza fa hiova tanteraka ny fiainany iray manontolo afaka fotoana tsy ela intsony. Zara raha nihiratra ny masony saron’ny volony nisavoritaka toy ny sanga fady fihogo saingy hihiratra dia hihiratra kosa ny fijeriny rehefa tonga ny Farandro. Akanjo mandry manga antitra no nanaovany ary ba kiraro tokana sisa no teny an-tongony, tsy hita izay nalehan’ny ilany. Sady nihaotra ny lamosiny izy no naka ny telefoniny dia nasosasony teny amin’ny efijery ny tanany ary nony tonga teny amin’ny rindrin’ny Facebook dia nihamailaka ny rantsan-tanany. Ny ladosiny nivantanany moa ny tanany tsy nitsaha-nisosasosa erak’iny Facebook rehetra iny. Mbetika mitia sarin’olona etsia, mbetika mitsatsaingona eny amin’ny resak’olona eroa. Mitsiky vendrana tsindraindray rehefa mahita sarin’ny olona mahafinaritra azy ao, indrindra moa rehefa ny olona mahafinaritra azy izay koa no mitia ny sariny, na ny resadresaka nozarainy tao. Mikakakaka izy rehefa sendra mahita ireo namany manao fihetsika kidaladala rehefa maka sary ary mimonomonona mazàna rehefa mahita vaovao etsy sy eroa tena manahirana nefa mijery hatrany: nirodana indray hono ny trano tary ananona tary e, niakatra indray ny rano teroa e, tra-boina aman’alina indray hono no nifamonjena vonjy maika e, nandona olona indray hono ny takisiabe tany ho any e, nipoaka indray hono ny baomba tany ananona tany e, nanao fihetsika mamoafady indray hono ny olo-malaza kintan’ny hirahira e…

Nijanona elaela teo amin’ny sarina saka mahafatifaty fotsy botsiaka nandihy valotra dia avy eo nitsingidina tampoka tsy hay hoe nahoana izy. Tapaka ny tsinain-dRabe sady hontsa kely ihany ny fony. Efa tsy tsaroany intsony ilay fandriana maminy dia maminy ery minitra vitsy lasa teo fa efa tafaroboka tanteraka tao anaty tontolo roa teboka aotra tao an-telefoniny tao izy. Nandritra izay fotoana izay moa tsy hitan-dRabe akory na ilay goaika nitazatazana, na ilay harona sase nihevaheva tao aorian’ilay goaika ka nentin’ny tsio-drivotra ka hatrany Analakely tany hanentsina tatatra efa ela no tsentsina, tranga efa mahazatra loatra na ho an’ny mpandeha tongotra eny afovoan’arabe, na ho an’ny mpivarotra eny an-tsisin’arabe, na ho an’ny fiarakodia mitohana mitandahatra, na ho an’ny moto misisitsisika, na ho an’ny mpitarika posy mitatitra entana aman-taonina. Ny sarety aman-kalesin-tsoavaly no mety tsy zatra izany satria rehefa mangiran-dratsy ihany ny andro vao mandehandeha eny afovoan-tanàna izy ireny hany ka tsy hitan’ny masony. Toy ny hoe mba malalaka ery rahateo Antananarivo rehefa tsy eo ingahibe masoandro, rehefa mbola any am-pandriana ny ankabeazan’ny olona, nefa Antananarivo, efa ela no tsentsina.

Toy ilay tatatra ihany.

3

Rehefa izay dia izay (nanampy kitoza teo am-bilian-dRabe izy).

Le Blog de Mose NjoMose Njo

• Toko I
• Toko II
• Toko III
• Toko IV
• Toko V
• Epilogy