18 (Aiza no mifarana ny nofy ka manomboka ny tenaizy?)
Tsy nanohitra akory fa lasa ny fo, tsy maninona, ento ho anao, rohito, trobaro, tsongoy, anaovy izay sitraponao rehetra, afeno, itsaho, oroy, poleso, dory, atsipazo, raiso, atsipazo indray, raiso, rangoty, safoy, fihino, vimbino, ario, zahao, ario indray, zahao, fihino, vimbino
NIDIRIDIRY IRERY TAO ANATIN’NY ALIN’NY EFITRAFANDRIANY Rabe sy ny fihetseham-pony nifamahofaho ary zara raha ny efijerin’ny telefoniny teo an-doham-pandriany sisa no nanazava ary ny sefosefony nikasokasoka sisa feo re nandravaka ny fahanginana.
Lasa saina izy.
Embona no nandrakotra, nisolo toerana ny rivotra ary hanina tsy hita faka no feom-balotra nampandihy ny ranomaso tsy latsaka na dia ambivitra. Na ny riorion’ny fiarakodia sendra nandalo sy ny vovon’ny alika tsy nana-tompo aza tsy reny intsony. Lasa saina izy. Izao ve ilay atao hoe tia? Nefa tia olona tsy misy akory, babo tanteraka nofy niserana, resy tanteraka tsy misy alaharo alaharo, roboka tsy nahy tao anaty ontana efa re ihany hoe misy, hita tamin’ny tele izao rehefa mandona ny tena tsy laitra tsy tanty tsy zaka ny havesany raha tsy mipaka, ny fo efa voaroba, sinto-mahery sinto-mahery, tsy an-kamerim-botsotra fa izay tratrany fay, izay tsy tratrany maniry hahatsapa. Nefa tia. An-kitsirano. Tsy nanohitra akory fa lasa ny fo, tsy maninona, ento ho anao, rohito, trobaro, tsongoy, anaovy izay sitraponao rehetra, afeno, itsaho, oroy, poleso, dory, atsipazo, raiso, atsipazo indray, raiso, rangoty, safoy, fihino, vimbino, ario, zahao, ario indray, zahao, fihino, vimbino, fihino, aza avela hisinda intsony, raiso ho anao tanteraka, raiso ho anao manontolo, tsy ho ahy intsony intsony, fa anao ny foko, anao irery ihany, anao manontolo. Anao aho. Vao nilentika tao anaty masoko ny masonao dia efa e, very aho, nitady lalana avy amin’ny masoko ny masonao, dia azonao ny foko. Azonao tanteraka.
Mandrakizay.
Doria.
Amena.
Nefa nofy. Nofy fotsiny ihany. Nofy tokoa? Nisy zavatra tsy matin-dRabe lolo mihitsy. Dia nofy koa ve izany ilay saika voadonan’ny takisiabe indray alahady iny? Zavatra noforonon’ny amparahatony?
Nifamahofaho ny tao an-dohany.
Hatraiza ny nofy no mifarana dia manomboka aiza ny tenaizy?
Ireo voambolana 👉 18
- nifamahofaho
nifangitotra, nikorontana ambony ambany
être entrelacé de manière informe, anarchique - hanina
tsiaro misy alahelo
coup de blues - valotra
paikatelo
valse - ambivitra
kely sisa tsy
sur le point de - riorio
vezivezy
errance - ankitsirano
tsy misy olakolaka
sans ambiguïté - amparahatoka
fiantso ny tsy takatry ny fiheverana
subconscient
Mose Njo