12

I12

0:00

/251.5

1×

Nikoropaka izaitsizy Rabe namoaka ilay telefoniny sady nanenoneno be izato mahitsizorony misy sarina paoma voakaikitra.

Nanomboka niakatra ny feon’ny iray fiangonana nimonomonona tsy tena niteny hoe piho any izany telefonina izany toa ireny misy zazakely mitomany ireny. Nodonin’ny reniny tamin’ny kihony Rabe. Fa vao mainka Rabe nikoropaka. Saika nianjera mihitsy àry ilay fitaovana raha nisy kely ary ambonin’izany tany amin’ny tsy izy no voapotsitry Rabe satria vao mainka nihamafy ny fanenon’ilay telefonina. Feo tokana nikarantsana niverimberina isaky ny segondra vitsivitsy ilay naneno. Feo manambara fa nahazo hafatra avy ao amin’ny Facebook Messenger ary hafatra maromaro nisesisesy no azony tamin’izay.

Ny nahagaga an-dRabe dia tsaroany mihitsy ny tanany nanapika an’ilay aplia talohan’ny nialany tany an-trano. Tsaroany mihitsy satria tamin’izy nitady an’ilay fihirana, teo amin’ilay seza borin’ilay piano no naka fotoana kely izy nanapika ny internet satria nanafatrafatra ny reniny hoe raha mbola manenoneno any am-piangonana io dia halainy ka tsy haveriny intsony.

Nefa izao dia manenoneno mandrebireby ny iray fiangonana mampikoropaka azy fatratra izao. Ny feon’i pasitera nanomboka niakatra niezaka angamba ny nanarona ny feon’ilay Facebook Messenger ary raha tsy ilay telefonina mihitsy no nopihan-dRabe tanteraka tsy nangina izato izy. Izay ihany koa vao nijanona ny don-kihon-dreniny. Nisento Rabe sady namerina ilay telefonina tao am-paosiny no nihevitra hoe ilay resaka tamba-be ireny indray izao izany, tsy dia misy dikany akory fa dia misy mampiditra ao amin’ny resaka iray dia lasa daholo miteny izay saim-patany ao sady mivanitika. Ny ankabeazany moa miala ilay resaka na tsy mamaky tsotra izao.

Niherika tampoka tany amin’ilay tovovavy ny mason-dRabe. Tsy teo amin’ny toerana nisy azy intsony ilay tovovavy. Rava ilay hosodokony. Sary mainty sy fotsy ahitana olona mikimpy tsy manambara inona loatra aminy sisa no tavela. Very hazavana ilay hosodokony. Banga ilay toerana, anti-dahy mitondra tehina sy ramatoa jejojejo nanao zipo somary hatreny am-poto-pe teo anilan’ilay tovovavy sisa no tazan-dRabe. Nitepotepo mafy ny fony. Sady trotraka izy no nikoropaka. Nivezika ny masony, havia, havanana, aloha, aoriana, teny rehetra teny, tsy hita intsony. Lasa ilay tovovavy. Ary mety tsy ho hitany intsony. Vao mainka nitepotepo ny fony. Dia toa ireny tsiky mambabo sendra mifanena eny an-dalana ireny tokoa ve? Manjelatra ny fo, tsaroana foana foana, ezahana tadiavina eraky ny tampon-tanety, antenaina hoe hipoitra isak’izay toerana aleha, karohana eraky ny Facebook nefa tsy hita mihitsy. Tsy hita intsony. Mampanontany tena mihitsy aza indraindray hoe tena nisy tokoa ve.

Dia lasa ity ilay tovovavy. Dia trotraka Rabe. Ngoly ny fony. Tsapany tany anatiny tany anefa hoe iny ilay izy. Iny ilay voatondro ho azy, silampanahy tafasaraka tao anatin’ny fotoana tsy hay faritany, silampanahy nifampitady efa ela dia ela hatraiza hatraiza. Tsia hoy Rabe. Tsy hijanona eto kosa aho, tsy hitanondrika maina eto fotsiny, tsy hiandry vasoka sanatria. Nitraka izy, nabontsiny ny tratrany, notapahany ny heviny fa andeha hivoaka izy hitady an’ilay tovovavy ka na ho bedin’ny reniny aza tsy nataony ahoana.

Koa tsy nisy hataka andro, nivoaka izy, ny fiangonana mbola niondrika, izy ity nitraka namonjy ny hazavana. Ny hazavan’ilay varavarana tazany fa nisokaka.

13

Nisy ra kely nitete teo amin’ny fihirifan’ilay tovovavy namonjy ny takolany, nofafany haingana tamin’ny lamba notafiany.

Le Blog de Mose NjoMose Njo