1 (Toko I - Taloha kelin'ny farandro)
Tsy mba miantra ireo mpatory marainan’izao tontolo izao izany tokoa io ingahibe masoandro io na tamin’ny fahagolan-tany izany na tamin’io andro io.
TOKO I - TANTARA NY FANDRIANA
NITSOROFOKA AVY TEO AM-BARAVARAKELIN’NY EFITRANOFANDRIAN-DRABE ilay tara-masoandro tsy voatsemban-drahona.
Nisitra avy hatrany ity farany. Mba nosintoniny tamin’ny tanany nalaindain-kihetsika ihany ilay bodofotsiny, saingy nanifinify ihany moa izato izy hany ka tsy nahasakana akory ny tsipi-kazavan’ingahibe masoandro tsy mba niraharaha ny torimasony izany.
Nikainkona Rabe, nikonaina, nivadibadika am-pitoerana, nangarika ilay lambam-baravarankely tokony niaro azy nefa injay namotsotra azy tsisy henatra akory, nikopakopaka tany amin’ny tsy izy tsy hay hoe nahoana. Tsy mba miantra ireo mpatory marainan’izao tontolo izao izany tokoa io ingahibe masoandro io na tamin’ny fahagolan-tany izany na tamin’io andro io. Koa nikomy Rabe, navalony roa mba hatevina kokoa ny bodofotsiny ary norakofany ny lohany manontolo sady nimonomonona kely izy.
Alatsinainy ny andro.
Mbola tsy nanao afa-tsy ny nanarangarana ny herinandro vao kandrefa ny hakamoan-dRabe efa nihoapampana sahady. Alatsinainy. Nahafinaritra azy anie izay zomà izay, ilay lalan’ny nody afa-belan’ny dabilio, lavitra kahie, penina, siponjy, solaitrabe sy ny forongon’ny sekoly rehetra. Ilay sabotsy koa tsy nahasosotra azy mihitsy, namela nikarenjy tetsy sy teroa, nampiady karajia, nitsoka kiririoka, nanao karaoke nanadinoana izay enti-mody mbola niandry tao an-kahie tao. Eny, na ny alahady izay tsy hay hoe maika ho aiza toa nandalo sy niserana fotsiny teo aza natsiro dia natsiro na dia nisosa toy ny rano an-damosin-gana fotsiny teo aza ilay fotoana.
Alatsinainy.
Andron’ireo tsy te hiarina avy teo am-pandriana rehetra manerana an’izao tontolo izao. Andron’ireo malaina nefa tsy afa-manoatra rehetra manerana ny lafy valon’ny nosy, manerana ny vazan-tany efatra. Andron’ireo te hamikitra fatratra ilay sisa minitra kely hany tsy aritra mba tavela ihany koa. Minitra iray, tokana, tsy mba kambana akory, mialohan’ny hisongadinan’ingahibe masoandro sy ny adidy aman’andraikitra kapoaka mangidy iantsorohana tsy an-kiato lava izao.
Ao anatin’ny Minitra 1, misy segondra 60, misy ropilanina 58 no miainga maneran-tany, 144 ny olona manambady, 257 ny zaza teraka, 104 ny olona maty, 243 000 ny sary zarain’ny olona ao amin’ny Facebook. Ary miha mitombo andro aman’alina izany tarehimarika izany.
Ao anatin’izay minitra iray tsy foy izay koa, mba mihena firy hekitara ireo sisa ala aman-tanety maitson’i Madagasikara tsy lanin’ny hagegen’ny doro tanety? Firy taonina ny fako sy maloto afafin’ny olona eny rehetra eny mitondra raha tsy henatra dia aretina, raha tsy fanafintohina dia hakiviana? Ary firy indray koa ny isan’ny olona miramirana, manome tsikitsiky ireo solafaka sendra azy ao anatin’izay minitra iray izay? Tsy dia hain-dRabe loatra ny valin’izany, tsy dia hainy ihany koa hoe ahoana no fomba ifikirana izay enimpolo segondra izay tsy hisinda mandrakizay mandrakizay ka nidify ihany anefa izay minitra singa izay. Taitra tsara ihany moa izy ny farany, indrindra rehefa nidradradradra izaitsizy ho ren-tany ren-danitra ny famohamandrin’ny telefoniny. Koa tampoka teo, mailaka ery ny tanany iray nivoaka ny faritry ny bodofotsy nanakatra ny telefoniny teo an-doham-pandriany — ary tsy arakaraka ny nampalaina azy hifoha ny hakingany. Avy dia nopihany ilay famohamandry nanenoneno, tsy an-kijery akory, toy ny efa hainy tsianjery izany, toy ny efa fanaony mahazatra, rehefa maraina iny ny andro, indrindra rehefa alatsinainy iny ny andro. Matselaka ery ny rantsan-tanany nandihy teo amin’ny efijery feno dian-tanan’ny telefoniny, nisosa niankavanana, nampangina ny tatatatany.
Nony avy eo, nahohony ilay telefoniny ka ilay sarina paoma voakaikitra teo an-damosiny sisa no niandrandra ny valindrihana nahatazanana diam-baolina maromaro nanodidina ilay takamoa. Mbola tsy nisy rahona teo akaikin’ilay takamoa tamin’izay.
Fa efa ho avy, efa ho avy, kely sisa, kely sisa…
Ireo voambolana 1 (potsiro eto) 👈
- nitsorofoka
niditra tampoka dia tampoka
entrer brusquement - nisitra
mamoaka feo s mitaritarika amin’ny vava ho mari-pandavana malefaka miharo tsififaliana sy dongidongy
rouscailler en émettant un son s traînant de la bouche en signe de protestation, de mécontenement tout en faisant la moue - nikainkona
nivonkina am-pitoerana
se recroqueviller - nikonaina
somary nimonomonom-pitarainana
gémir en silence - nanarangarana
somary nitsikilo ka niezaka izay nahitana azy
jeter un regard tout en évitant d’être vu - kandrefa
kanefa
cependant - nihoapampana
diso tafahoatra
trop - nampiady karajia
kilalao ana hakingantsaina miendrika resadresaka mifono fandrimpandrika matetika mampihomehy
jeux d’esprit sous forme de joutes verbales prêtant souvent à rire - kiririoka
zavamaneno kely miendrika fantsona fohy mamoaka feo maranitra
sifflet - nisosa toy ny rano an-damosin-gana
nandalo haingana dia haingana
passer trop vite - iantsorohana
atao antsangory
que l’on porte sur les épaules - fanafintohina
manao izay hahatezitra
enrager - famohamandry
neno manambara hoe tokony hifoha maraina
réveil - matselaka
mailaka
agile - efijery
velarana isehoana sary na datà elektronika
écran - tatatatany
feo miverimberina lavareny
son entêtant qui se répète encore et encore - nahohony
natsingoloka, ka ny lamosiny no lasa ambony, ary ny kibony no lasa ambany
poser l’écran face à la table - valindrihana
ny mifanohitra amin’ny gorodona, eo ambony loha
plafond - takamoa
jiro kely miendrika gilaoby
ampoule
(Tohiny) 👇
Mose Njo