Ireo zanakavavy roa amby folon'ilay mpanjaka

Ireo zanakavavy roa amby folon ilay mpanjaka

0:00

/199.285011

1×

Raha amin'ny teny frantsay, dia peho eto 👇

Les douze filles du roi

Il était une fois, douze filles d’une reine qui était enceinte, sur le point d’accoucher

Le Blog de Mose NjoMose Njo

Indray andro hono, nanana zanakavavy roa amby folo ilay mpanjaka. Bevohoka be anefa izy, efa kely sisa dia ho teraka, ka hoy ilay olona mibitsika teo an-tsofiny taminy hoe:

"Raha lahy io zanakao io, dia tsy maintsy vonoina ny zanakavavinao rehetra, amin'izay mateza ny fanjakanao"

Dia nalahelo izy saingy tsy hitany izay atao. Koa ny mpanjaka vadiny no avy hatrany dia niteny tamin'izy roa amby folo vavy hoe:

"Mandehana ianareo zanako vavy, mitsoaka miafina any amin'ilay tranontsika ery amin'ilay vohitra iray iry. Ka izao atao, rehefa misy setroka be mivoaka avy ato an-dRova, dia teraka izay reninareo. Raha fotsifotsy ilay setroka, dia lahy izay ny zandrinareo, ka aza miverina intsony fa mandehana mandositra lavitra ny firenentsika. Raha maintimainty kosa, dia vavy izay ny zandrinareo, ka afaka miverina soamantsara ianareo."

Variana nangovitra anefa izy roa amby folo mirahavavy ka tsy henony tsara ny lazain'ny rainy taminy. Natahotra mafy izy ireo, ka resin'ny tahotra hany ka ny zava-dehibe tokony henoiny, tsy henony. Tsaroany fotsiny hoe nisy resaka setroka. Izay ihany. Lasa nitsoaka tany amin'ilay trano kosa ry zareo.

Andro vitsivitsy taty aoriana, iny fa nisy setroka nivoaka avy ao an-dRova. Taitra izy roa amby folo mirahavavy. 

"Ahoana moa hoy i dada teo ry zareo? Rehefa maninona moa ilay setroka no maninona?"

Dia tsy nisy tena nahatadidy tsara ry zareo fa niady hevitra teo hoe rehefa maintimainty moa dia izao, sa rehefa fotsifotsy dia izao. Sady nangovitra ihany no tsy nankaiza loatra ilay resaka fa nikoropadropaka tao fotsiny.

Nony elaela, dia tapakevitra ry zareo fa hiverina any an-dRova. Nisy nidrikina ihany hoe tsy aleo ve mitsoaka raha tsy azontsika antoka hoe lahy sa vavy ilay zandrintsika, na farafaharatsiny tsikilovina any aloha, manontanitany izay vao miverina. 

Nampiakapeo anefa ilay vavimatoa, dia tsy nahavita namaly loatra ireo zandriny fa resy lahatra teo, dia nanaraka daholo.

Ny setroka tamin'izay mbola nidofaka tsara. Setroka fotsifotsy toy ny rahona.