Ireo goaika sy ilay zandriny
Indray andro hono, nisy mpivady niteraka ny zanany farany. Narofy dia narofy ilay zaza ary nanahy mafy izy mivady hoe sanatria ho faty tsy ho ela
Raha amin'ny teny frantsay, dia peho eto 👇
Mose Njo
Indray andro hono, nisy mpivady niteraka ny zanany farany. Narofy dia narofy ilay zaza ary nanahy mafy izy mivady hoe sanatria ho faty tsy ho ela.
Naniraka an'ireo zokiny izy mivady haka dokotera haingana. Dia lasa ireto zokiny naka dokotera, saingy varian-dalao teny an-dalana ry zareo hany ka tezitra ny dadany hoe nankaiza ihany.
Ka hoy ilay dadany:
"Loza ho an'ireny zanako ireny, enga anie ireny ka hivadika goaika!"
Hoy kosa ny reniny:
"Ity vavanao! Ity zanatsika farany ity aza jereo, marofy dia marofy asa raha ho tana ny ainy, koa ny zanatsika hafa indray no ozoninao hivadika goaika!"
Dia nanenina avy hatrany ilay rainy, nefa efa tara loatra, nivadika goaika ireo zanany ary lasa nanidina tsy hay hoe ho aiza.
Avotra kosa ilay zaza narofy, ary nihalehibe tsara dia lasa ankizivavikely mahafatifaty kely sy matomatotra kely.
Indray hariva izay, henony niresaka ny raiamandreniny, dia fantany tamin'izay hoe manan-joky izy ary nivadika goaika ireo zokiny.
Tapaka ny heviny, fa andeha hitady ireto zokiny izy, ary hanavotra an'izy ireo.
Dia nitady izy ka nitady, lasa lavitra dia lavitra. Rehefa nanakaiky ny masoandro izy, dia tsapany namay loatra ka lasa izy nihazakazaka nankany amin'ny volana. Fa nangatsiaka loatra indray ny volana, dia lasa izy nihazakazaka nanatona ny kintana.
Dia onena kely ireo kintana raha nihaino ny tantarany, hany ka natorony an'ilay ankizivavikely hoe aiza no misy an'ireo zokiny.
Dia lasa ilay ankizivavikely nihazakazaka nankany amin'ilay toerana natoron'ireo kintana, dia hitany ireo zokiny, hitany hoe efa nivadika goaika.
Dia faly ery ilay ankizivavikely nihaona tamin'ireo zokiny, dia faly ery ihany koa ireo zokiny nihaona tamin'ny zandriny.
Saingy tsy nety nivadika olona intsony ireo goaika. Izao izahay afaka manidina etsy sy eroa, hoy ry zareo.
"Mahafinaritra loatra ilay manana elatra hanidinana!"
Dia nalahelo kely ilay ankizivavikely zandriny, fa azony ihany hoe nahoana no mahazo aina ery ireto zokiny rehefa goaika.
"Aza malahelo", hoy ireo zokiny, "Hanaraka anao ihany izahay, dia hipetraka tsy lavitra ny trano, dia hijerijery sy hanaramaso anao faravavy kely sy ny dada sy mamantsika fa aza manahy"
Dia faly ery ilay ankizivavikely, dia nizotra nody izy, ireo goaika nanaraka anazy tsimoramora teny ambany rahona teny.
👇👇👇