Ilay zazavavindrano sy ilay tovolahy

Ilay zazavavindrano sy ilay tovolahy

0:00

/269.996009

1×

Raha amin'ny teny frantsay, dia peho eto 👇

L’ondine et le jeune homme

Il était une fois, une ondine très belle qui se reposait au bord d’une rivière

Le Blog de Mose NjoMose Njo

Indray andro hono, nisy zazavavindrano tsara tarehy dia tsara tarehy nipetrapetraka teny amoron-drenirano. Lava dia lava ny volony, ary lava dia lava ihany koa ny tongony. Mitovy amintsika olombelona ihany izy, tsy trondro ny tongony, saingy mipetraka sy mahavita miaina ao ambany rano fotsiny ary hafa ny fombany.

Nisy lehilahy iray nahatazana hono izy, ka avy hatrany dia babo ilay lehilahy nahita ny hatsaràny, tonga dia raikipitia taminy avy hatrany.

Tapakevitra àry ilay lehilahy fa hanatona, hiresaka aminy, saingy nitsoraka tao anaty rano ilay zazavavindrano ka tsy niakatra intsony.

Dia nalahelo ilay lehilahy, saingy tsy kivy izy.

"Hiverina eto aho isan'andro, amin'izao ora izao", hoy izy anakampony.

Dia niverina teo izy isan'andro, ary isan'andro dia nitaninandro teo ilay zazavavindrano, ary isan'andro dia isaky ny handeha hanatona ilay tovolahy, dia nitsoraka ilay zazavavindrano.

Kivy ihany ilay tovolahy nony ela ny ela, hoe ahoana àry ny hatao.

Indray andro tapakevitra fa tsy hanatona, fa hiantsoantso. Dia niantsoantso izy.

"Zavavavindrano, zazavavindrano!"

Dia taitra ilay zazavavindrano, dia nitodika kely tany amin'ilay tovolahy izy. Izay izy vao nitodika tany amin'ilay tovolahy. Ary vao mainka hitan'ilay tovolahy ny hatsarantarehiny, vao mainka ilay tovolahy raikipitia taminy.

Saingy nitsoraka tao anaty rano hatrany ilay zazavavindrano.

Fa tsy dia kivy loatra ilay tovolahy, falifaly ny fony hoe nitodika ilay zazavavindrano.

Ny ampitson'iny, niverina teo ilay tovolahy, dia sady tsy nanatona izy no tsy niantsoantso fa nanao zavatra hafa.

Zavatra hafa mihitsy.

Nihira izy.

Meva ny feon'ilay tovolahy, meva toy ny tarehin'ilay zazavavindrano.

Ka tsy nitsoraka ilay zazavavindrano tamin'izay, fa nihaino ny hiran'ilay tovolahy, nankafy, ary nony nihirahira elaela ilay tovolahy, dia nitodika izy ka nifanojo ny mason'izy roa.

Dia tsy nitsoraka ilay zazavavindrano, fa nitsangana izy dia nihira koa, nampiarapeo tamin'ilay tovolahy.

Meva dia meva ny hiran'izy roa, meva tsy nisy ohatra an'izany.

Mandrak'ity ny androany hono, dia mbola mihira hono ilay tovolahy sy ilay zazavavindrano, ary ny hirampitiavana tsara indrindra hono dia noforonin'ny olona izay nahare tamin'ny fony ny hiran'ilay tovolahy sy ilay zazavavindrano.