Ilay baolina sy ilay popeta

Ilay baolina sy ilay popeta

0:00

/222.909

1×

Raha amin'ny teny frantsay, dia peho eto 👇

Le ballon et la poupée

Il était une fois, un petit garçon et sa sœur qui ont eu de nouveaux jouets. Le petit garçon a reçu un ballon, la petite fille une poupée

Le Blog de Mose NjoMose Njo

Indray andro hono nahazo kilalao izy mianadahy kely. Ilay ankizilahikely nahazo baolina, ilay ankizivavikely nahazo popeta.

Dia faly ery izy mianadahy kely, ilay ankizilahikely nilalao baolina tany an-tokotany, moa ilay ankizivavikely nilalao popeta tao an'efitra.

Indray hariva izay aza, hadino teny an-tokotany ilay baolina, nefa oram-baratra tamin'ny alina, nifofofofo be ny rivotra, dia notsofin'ny rivotra lavitra tany ilay baolina.

Ny ampitson'iny, nisy andian'ankizilahikely nahita an'ilay baolina, nanontany tena hoe an'iza koa ity, dia avy eo nandakandaka an'ilay baolina. Nisy iray tamin-dry zareo nandaka mafy loatra an'ilay baolina, ka lasa tany lavitra tany tsy tazany intsony hoe nankaiza. 

Ilay ankizilahikely tamin'io nitomany tao an-trano fa tsy hita ny baoliny. Onena taminy ilay anabaviny, dia hoy izy hoe:

"Ndao hiaraka hilalao popeta miaraka amiko!"

Tsy nety anefa ilay anadahiny fa hoe popeta kilalaom-behivavy fa tsy kilalaon-dehilahy.

"Hay ve e?, hoy ilay ankizivavikely. "Ary ny baolina  kilalaom-behivavy sa kilalaon-dehilahy?", hoy ilay ankizivavikely nanontany.

"Kilalaon-dehilahy", hoy ilay ankizilahikely tsy nisalasala.

Dia lasa saina ilay ankizivavikely, tsaroany fa nahita lalao baolina kitra vehivavy izy tamin'ny tele, fa naleony tsy niteny. Mbola nalahelo ny baoliny very ny anadahiny.

Lasa ihany koa ny sainy nieritreritra hoe moa ireny filma hitany amin'ny tele ireny tsy karazana popeta ihany, mamorona tantara, dia mampiaina an'ilay izy, saingy hafa kely fotsiny, fa naleony tsy niteny fa mbola nalahelo ny baoliny very ny anadahiny.

Dia nivoaka tany an-tokotany izy, dia nisy mpifanolobodirindrina tamin-dry zareo nandondona tao am-bavahady nanontany hoe:

"Tsy anareo ve ity baolina ity?"

Dia faly ery ilay ankizivavikely fa tsy halahelo intsony ny anadahiny, dia noraisiny ilay baolina no nolalaoviny teo an-tokotany.

Dia henon'ilay anadahiny hoe misy milalao baolina ao an-tokotany izany, dia nihazakazaka nivoaka izy ka akory ny hafaliany fa hita indray ilay baoliny very.

Dia niara-nilalao baolina niaraka tamin'ny anabaviny ny hariva tontolo izy.